BODEGA NG PALAY SA TALISAY, CAMARINES NORTE, SINUNOG DI UMANO NG HINDI PA MABATID NA SALARIN

Abo na ng madatnan ni Ginoong Benjamin Bravo Arce ang kanyang bodega ng palay na nasa P-2 Brgy. Sto Niño, Talisay kamakalawa ng umaga.

Base sa salaysay ni Ginoong Arce sa himpilan ng Talisay PNP, bandang alas 7:00 ng umaga kamakalawa ng kanyang bisitahin ang kanyang bodega ng palay sa nasabing lugar subalit laking gulat n’ya umano ng kanyang madatnan na abo na ito lahat sanhi ng pagkakasunog ng hindi pa mabatid na salarin.

Base umano sa mga residente malapit sa kanyang bodega, bandang alas 10:00 umano ng gabi ng biglang sumiklab ang apoy at dahil sa mabilis ang pagkalat nito hindi na umano nagawa maisalba pa ng mga residente ang nasabing bodega hanggang sa tuluyan nalamang itong natupok.

Maliban sa nasabing bodega, sinira rin umano ang kanyang pananim malapit sa kanyang bodega na hinihinalang iisang tao lamang gumawa.

Si Ginoong Arce ay may-asawa at residente ng P-4 Brgy. Caawigan, Talisay, Camarines Norte.

Sa ngayon patuloy pang iniimbistigahan ng mga awtoridad ang pangyayari at kung sino ang responsible sa panununog.

Inaalam pa rin hanggang ngayon ang halaga ng pinsalang iniwan ng apoy.